ភ្នំពេញ៖ នៅរសៀលថ្ងៃទី២១ ខែកុម្ភៈ ឆ្នាំ២០១៣ នៅសាកលវិទ្យាល័យ អាស៊ី អឺរ៉ុប បានរៀបចំពិធីការពារ និក្ខេប បទបញ្ចប់ ការសិក្សាថ្នាក់បណ្ឌិត របស់បេក្ខជនបណ្ឌិត សេង សុវណ្ណារ៉ា ឯកទេស រដ្ឋបាលសាធារណៈ ជំនាន់ទី១ វគ្គ១ ក្រោមប្រធានបទ ការគ្រប់គ្រងរដ្ឋបាល នៅសាលាដំបូងរាជធានីភ្នំពេញដោយមានគណៈកម្មការវាយតម្លៃ ៧រូប រួមមាន ឯកឧត្តមបណ្ឌិត សភាចារ្យ ខៀវ ថវិកា ប្រធានគណៈកម្មការ, បណ្ឌិត សយ រាសី សាស្រ្តាចារ្យវាយតម្លៃទី១, បណ្ឌិត សឿន សោភ័ណ សាស្រ្តាចារ្យវាយតម្លៃទី២, បណ្ឌិត សំ នារី សាស្រ្តាចារ្យ វាយតម្លៃទី៣, បណ្ឌិត ជ័យ សារិន សមាជិក, បណ្ឌិត អិម វិបុល សមាជិក និងបណ្ឌិត ទេព ឈុនណារិទ្ធ ជាលេខាកត់ត្រា។
នៅក្នុងពិធីនេះដែរ ក៏មានការអញ្ជើញ ចូលរួមពីលោក ជ័រ ស្ដើង តំណាងក្រសួងអប់រំ យុវជន និងកីឡា និង សាស្រ្តាចារ្យបណ្ឌិត អ្នកជំនាញមកពីក្រសួង គណៈគ្រប់គ្រងសាកលវិទ្យាល័យ និងនិស្សិតបណ្ឌិតរួមជំនាន់ជាច្រើនរូបផងដែរ។
លោក សេង សុវណ្ណារ៉ា បានមានប្រសាសន៍ថា ប្រធានបទខាងលើ បានផ្តោតការសំខាន់ទៅលើការរួមចំណែក ជាមួយរាជរដ្ឋាភិបាល ក្នុងការអនុវត្តកំណែទម្រង់ តុលាការ និងប្រព័ន្ធយុត្តិធម៌ នៅកម្ពុជា ឲ្យកាន់តែមាន ប្រសិទ្ធ ភាពខ្ពស់ ដើម្បីជំរុញការកសាងប្រទេសប្រកបដោយ និរន្តរភាព និងនីតិរដ្ឋ ។ ម្យ៉ាងទៀត ការសិក្សានេះមានសារប្រយោជន៍ ដល់ប្រព័ន្ធយុត្តិធម៌សង្គម ស្ថាប័នសាលាដំបូង រាជធានី-ខេត្ត ជាពិសេស មន្ត្រីយុត្តិធម៌គ្រប់លំដាប់ថ្នាក់ និស្សិត បញ្ញាវន្តក្នុងគ្រឹះស្ថានសិក្សាអប់រំផ្នែកច្បាប់ និងអង្គការ សង្គមស៊ីវិលនានា ក្នុងក្របខ័ណ្ឌអាជីពជាអ្នកការពារច្បាប់។
ជាទីបញ្ចប់គណៈកម្មការវាយតម្លៃ បានសម្រេចប្រកាសលទ្ធផល ឲ្យបេក្ខជនបណ្ឌិត សេង សុវណ្ណារ៉ា បានបញ្ចប់ការ សិក្សាថ្នាក់បណ្ឌិតដោយជោគជ័យ និងជាបណ្ឌិត ចាប់ពីពេលនេះតទៅ។
សូមបញ្ជាក់ផងដែរថា សាកលវិទ្យាល័យ អាស៊ី អឺរុប បាននិងកំពុងបណ្តុះបណ្តាល និស្សិតថ្នាក់បណ្ឌិត បានពីរជំនាន់លើជំនាញ ដូចជា នីតិសាស្រ្ត វិទ្យាសាស្រ្ត នយោបាយ រដ្ឋបាលសាធារណៈ ទំនាក់ទំនងអន្តរជាតិ វិទ្យាសាស្រ្តសេដ្ឋកិច្ច និងគ្រប់គ្រងពាណិជកម្ម ជាដើម ៕
No comments:
Post a Comment