មជ្ឈដ្ឋានមិត្តអ្នកអានបានផ្តល់ពិន្ទុវាយតម្លៃទៅលើការដឹកនាំរបស់ឯកឧត្តម អ៊ឹម សិទ្ធី រដ្ឋមន្ត្រីក្រសួងអប់រំ យុវជន និងកីឡា ថា ដឹកនាំប្រកបដោយភាពពុករលួយ និងមិនខ្វល់ពីមន្ត្រីក្រោមឱវាទនៅថ្នាក់កណ្តាល។
ពាក់ព័ន្ធនឹងការរៀបចំដំណើរការប្រឡងសញ្ញាបត្រមធ្យមសិក្សាទុតិយភូមិចាប់តាំងពីចុងខែកក្កដា កន្លងមក ក្រសួងអប់រំបានចំណាយថវិការាប់លានរៀលចំពោះការប្រឡង ដើម្បីសម្រិតសម្រាំងគុណភាពអប់រំ។ ប៉ុន្តែការចំណាយថវិកាទាំងនេះមិនបានឆ្លើយតបទៅនឹងផែនការអប់រំនោះទេ ព្រោះឯកឧត្តម អ៊ឹម សិទ្ធី បានបណ្តែតបណ្តោយឲ្យមន្ត្រីនាយកដ្ឋានមធ្យមសិក្សាចំណេះទូទៅបង្កភាពពុករលួយតាមអំពើចិត្តក្នុងការរៀបចំគណៈកម្មការមេប្រយោគប្រឡង ដែលត្រូវបានប្រិយមិត្តអ្នកអានបង្ហាញនូវហេតុផល ដូចតទៅ៖
១- គណៈកម្មការមេប្រយោគទូទាំងប្រទេស និងអប្បមាទ គឺរៀបចំតាមខ្សែ «អ្នកស្និទ្ធស្នាល នៅខេត្តជិត និងអ្នកមិនស្និទ្ធស្នាល ត្រូវរៀបអីវ៉ាន់ចេញទៅខេត្តឆ្ងាយៗដាច់ស្រយាល»។
២- គណៈកម្មការអប្បមាទត្រូវកំណត់យកអ្នកមានតួនាទីជាប្រធាន អនុប្រធានការិយាល័យ ប៉ុន្តែលេចចេញឃើញមានមន្ត្រីមួយចំនួនដែលមិនឋិតក្នុងនាយកដ្ឋានជំនាញក៏បានចូលរួមជាគណៈកម្មការអប្បមាទដែរ «អ្នកទាំងនោះមានខ្សែទុយោ និងមានបក្ខពួករបស់ខ្លួន»។
៣- ប្រធាន អនុប្រធានមណ្ឌលមួយចំនួនរៀបចំតាមបណ្តាញពុករលួយ ជាពិសេសសូកយកប៉ុស្តិ៍ល្អៗ។ ម្យ៉ាងទៀតគឺត្រូវបានរៀបចំប្រធាន អនុប្រធានមណ្ឌលជាក្រុម ដើម្បីងាយស្រួលពេលដំណើរការវិញ្ញាសា ហើយប្រធាន អនុប្រធានមណ្ឌលមួយចំនួនឆ្នាំណាក៏ដង្ហែនៅមណ្ឌលជាមួយគ្នាដែរ «ដូចជាមណ្ឌលវិទ្យាល័យបាក់ទូកឆ្នាំ២០១២ និងមណ្ឌលវិទ្យាល័យព្រែកឯង ឆ្នាំ២០១៣ និងនៅមណ្ឌលផ្សេងៗទៀត»។
៤- គណៈកម្មការត្រួតអគារ និងអនុរក្សឆ្លងខេត្ត ជារៀងរាល់ឆ្នាំមានការសូកប៉ាន់រើសយកប៉ុស្តិ៍ក្នុងតម្លៃពី១៥ដុល្លារ ទៅ២០ដុល្លារអាមេរិក ហើយបណ្តាញទាំងនោះគឺការិយាល័យប្រឡង ឬការិយាល័យមធ្យមសិក្សាចំណេះទូទៅតាមខេត្តជាអ្នកនាំសារ។ រីឯមួយចំនួនទៀតគឺមន្ត្រីការិយាល័យប្រឡងនៃនាយកដ្ឋានមធ្យមសិក្សាចំណេះទូទៅ។
៥- ចំណែកគ្រូ ដែលមិនបង្រៀនថ្នាក់ទី១២ នៅរាជធានីភ្នំពេញ ភាគច្រើនគឺចេញធ្វើជាគណៈកម្មការអនុរក្សផង និងជាគណៈកម្មការបែងចែកសន្លឹកកិច្ចការផងដែលរៀបចំជាបណ្តាញសូកប៉ាន់ តាមសាលា ដើរតួជាអ្នកនាំាសារ «សូមពិនិត្យមើលលិខិតឧទ្ទេសនាមអនុរក្ស និងលិខិតឧទ្ទេសនាមបែងចែកសន្លឹកកិច្ចការនៅ៩មណ្ឌលកំណែ»។
៦- គណៈកម្មការបូក ស្រង់ ពិនិត្យផ្ទៀងផ្ទាត់ពិន្ទុ «លិខិតឧទ្ទេសនាមលេខ៣៥មប្រទ» មានបាតុភាពមិនប្រក្រតីមួយចំនួន ដោយគណៈកម្មការទាំងនោះមួយចំនួនកើតចេញពីការសូកប៉ាន់ «តម្លៃពី២៥ដុល្លារ ទៅ២៥ដុល្លារអាមេរិក» ដូចជាមន្ត្រីអប់រំថ្នាក់ក្រោមជាតិមួយចំនួន ខ្លះចេញធ្វើជាគណៈកម្មការ ប្រធាន អនុប្រធានមណ្ឌល ខ្លះធ្វើជាគណៈកម្មការអប្បមាទ និងខ្លះទៀតធ្វើជាអនុរក្សនៅតាមមណ្ឌលក្នុងខេត្ត។ ប៉ុន្តែពេលបូក ស្រង់បែរជាមានឈ្មោះចេញជាគណៈកម្មការបូក ស្រង់ពិន្ទុ ខ្លះជាគណៈកម្មការពិនិត្យពិន្ទុ «Sic!»។
៧- ចំពោះមន្ត្រីបម្រើការងារនៅថ្នាក់កណ្តាលវិញ គឺឯកឧត្តម អ៊ឹម សិទ្ធី ដែលជារដ្ឋមន្ត្រីមិនខ្ចីខ្វល់ខ្វាយឈឺក្បាលហាលងៀតអ្វីឡើយ ទោះបីមន្ត្រីអប់រំដែលបម្រើការងារនៅតាមអង្គភាពនានាចំណុះក្រសួងទាំងនោះមួយចំនួនមិនបានចូលរួមធ្វើជាគណៈកម្មការផ្សេងៗក្នុងការប្រឡងសញ្ញាបត្រទុតិយភូមិក៏ដោយ។
ប្រិយមិត្តអ្នកអានក៏បានទាញអារម្មណ៍ឲ្យមានការពិចារណាដែរថា មន្ត្រីអប់រំធ្វើការនៅថ្នាក់កណ្តាល ធ្វើការពីរពេល ក្នុងមួយថ្ងៃដោយទទួលបានប្រាក់បៀវត្សរ៍តិចតួច បែរជាមិនឲ្យចូលរួមធ្វើជាគណៈកម្មការផ្សេងៗក្នុងការប្រឡងបាក់ឌុប តើនេះជាមេដឹកនាំល្អឬ? ចំណែកគ្រូបង្រៀននៅរាជធានីភ្នំពេញ ធ្វើការមួយសប្តាហ៍ ១៦ ឬ១៨ ម៉ោងទទួលបានប្រាក់បៀវត្សរ៍គួរសម បែរជាបានចូលរួមក្នុងគណៈកម្មការប្រឡង២ ឬ៣ដង ទាំងប្រឡងសញ្ញាបត្រទុតិយភូមិ ទាំងបឋមភូមិ ខណៈដែលនាយកវិទ្យាល័យ និងមន្ត្រីមន្ទីរអប់រំ យុវជន និងកីឡាខេត្ត ដែលចេញជាប្រធាន អនុប្រធានមណ្ឌល ជាអប្បមាទ ជាអនុរក្ស បែរជាឲ្យចូលរួមក្នុងគណៈកម្មការបូក ស្រង់ពិន្ទុថែមទៀត តើនេះមានយុត្តិធម៌ដែរឬទេ?៕
ប្រភព៖ ដើមត្នោត
No comments:
Post a Comment