គ្រូបង្រៀនខ្លះនៅសាលាគរុកោសល្យខេត្តសៀមរាប បានសំដែងការមិនពេញចិត្តចំពោះមន្ត្រី ការងាររដ្ឋបាល ដែលតម្រូវឱ្យពួកគេបង់ប្រាក់នៅពេលដែលទទួលធ្វើសំណុំឯកសារជុំវិញការសុំដំឡើងថ្នាក់មន្ត្រីរាជការនោះ។
ស្ដាប់ ឬ ទាញយកសំឡេង
ក្រុមគ្រូបង្រៀនបាននិយាយថា បច្ចុប្បន្នពួកគេដែលមានតួនាទីត្រឹមតែគ្រូបង្រៀន គឺមិនមានប្រាក់គ្រប់គ្រាន់ដើម្បីបង់ថ្លៃឡើងថ្នាក់បានទេ។
គ្រូបង្រៀនថ្នាក់មធ្យមនៃកម្រិតមូលដ្ឋានម្នាក់ នៅសាលាគរុកោសល្យខេត្តសៀមរាប គឺលោក ជួប សំអុល។ លោកបានមានប្រសាសន៍កាលពីថ្ងៃសៅរ៍ ទី២៦ ខែតុលា ថា ជាច្រើនឆ្នាំមកហើយ ក្រុមរបស់លោកដែលមានគ្នាប្រមាណ ៦-៧នាក់ បានខិតខំព្យាយាមទៅរៀននៅមហាវិទ្យាល័យឯកជន លុះបញ្ចប់ថ្នាក់បរិញ្ញាបត្រហើយ គឺស្ថាប័នដែលលោកបម្រើការបានអនុញ្ញាតឱ្យឡើងកាំពិសេស។ ក៏ប៉ុន្តែនៅពេលដែលក្រុមរបស់លោករៀបចំបំពេញឯកសារ ដើម្បីឡើងកាំពិសេសរួចរាល់ ស្រាប់តែខាងហិរញ្ញវត្ថុតម្រូវឱ្យបង់ប្រាក់ម្នាក់ ២០ដុល្លារសហរដ្ឋអាមេរិក។
លោក ជួប សំអុល បានបញ្ជាក់ថា លោកមិនពេញចិត្តចំពោះការដំឡើងឋានៈមន្ត្រីរាជការតម្រូវឱ្យបង់លុយដូច្នេះទេ៖ «ខ្ញុំអត់សប្បាយចិត្ត ហើយខ្ញុំថា ខ្ញុំអត់បង់ទេ។ ១កាំ ៣-៤ពាន់រៀល រួចហើយទារដល់ទៅ ២០ដុល្លារអាមេរិក មានស្អី? ...អយុត្តិធម៌មែនទែនតែម្ដង។ ធ្វើអ៊ីចឹងគ្រូបាក់ទឹកចិត្ត អ្នកខ្លះនោះអត់ចង់ធ្វើ ឮតែ ២០ដុល្លារ គ្នាអត់លុយបង់។ ចង់ឱ្យនាយកដ្ឋានបុគ្គលិក និងហិរញ្ញវត្ថុ ជួយពន្យល់ពីបញ្ហាដំឡើងកាំពិសេសហ្នឹង ហេតុអ្វីបានជាយកលុយ?»។
គ្រូបង្រៀនដដែលបានបញ្ជាក់ថា នៅពេលដែលលោកជជីកសួរពីរឿងនេះ គឺមន្ត្រីមន្ទីរអប់រំថ្នាក់ខេត្តឆ្លើយថា ជាគោលការណ៍ដែលចេញពីក្រសួង។
ទោះយ៉ាងណា វិទ្យុអាស៊ីសេរី មិនអាចទាក់ទងមន្ត្រីក្រសួងអប់រំយុវជននិងកីឡា ដើម្បីសុំការពន្យល់បានថាយ៉ាងណានៅឡើយ។
ចំណែកប្រធានមន្ទីរអប់រំយុវជននិងកីឡា ខេត្តសៀមរាប លោក អ៊ុង សេរីឌី បានបដិសេធមិនធ្វើការពន្យល់បញ្ហានេះ ដោយលោកមានប្រសាសន៍ថា កំពុងជាប់រវល់ប្រជុំ។
សមាគមគ្រូបង្រៀនកម្ពុជាឯករាជ្យបានអះអាងថា ការដំឡើងថ្នាក់គ្រូបង្រៀននៅតាមបណ្ដាខេត្តក្រុងនានា គឺក្រសួងអប់រំយុវជននិងកីឡា មិនមានគោលការណ៍ណាមួយតម្រូវឱ្យបង់លុយដូច្នេះទេ។
ប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន បានចាត់ទុកការយកលុយពីគ្រូបង្រៀននៅពេលឡើងកាំមន្ត្រីរាជការនោះ គឺគ្រាន់តែជាការឆ្លៀតឱកាសពីជនមួយចំនួនដែលធ្វើខុសច្បាប់៖ «ការដែលទារថ្លៃហ្នឹង គ្រាន់តែជាជនឆ្លៀតឱកាស ដើម្បីកេងចំណេញលើគ្រូបង្រៀន ឬមួយក៏ជាការប្រព្រឹត្តអំពើពុករលួយហើយ»។
លោក រ៉ុង ឈុន បានជំរុញឱ្យរដ្ឋមន្ត្រីក្រសួងអប់រំយុវជននិងកីឡា ដែលទើបតែឡើងកាន់តំណែងថ្មី ត្រូវចាត់វិធានការផ្លូវច្បាប់ ដើម្បីលុបបំបាត់បញ្ហាទាំងនោះ ជៀសវាងកុំឱ្យមានបញ្ហាដដែលៗនេះនៅតែកើតមានតាំងតែពីយូរមកហើយ និងបន្តទៅមុខទៀត៕
ផ្សាយបន្តពី RFA ភាសាខ្មែរ
ផ្សាយបន្តពី RFA ភាសាខ្មែរ
No comments:
Post a Comment