រដ្ឋមន្ត្រីក្រសួងអប់រំ យុវជន និងកីឡា ដែលទើបចូលកាន់តំណែងថ្មី បានប្រកាសអំពីការកែទម្រង់លើវិស័យអប់រំ និងពង្រឹងវិស័យអប់រំ ឡើងវិញ។ កន្លងមក វិស័យអប់រំកម្ពុជា ទទួលរងការរិះគន់ជាច្រើន ដូចជា ប្រាក់ខែមន្ត្រីរាជការ ពិសេសគ្រូបង្រៀនមិនអាចសមាមាត្រនឹងតម្លៃទំនិញ ដែលនាំឲ្យគ្រូខ្លះប្រព្រឹត្តអំពើពុករលួយ និងគ្រូខ្លះយកម៉ោងរដ្ឋទៅបង្រៀនសាលាឯកជនជាដើម។
ស្ដាប់ ឬ ទាញយកសំឡេង
រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារ៉ុន ថ្លែងក្នុងវេទិកាស្ដីពីការងារអប់រំ យុវជន និងកីឡា នាវិទ្យាស្ថានជាតិអប់រំ រាជធានីភ្នំពេញ កាលពីថ្ងៃទី២១ ខែតុលា ឆ្នាំ២០១៣។ RFA/Ouk Savborey
លោករដ្ឋមន្ត្រីក្រសួងអប់រំ យុវជន និងកីឡា ដែលទើបឡើងកាន់តំណែងថ្មី ប្ដេជ្ញាអនុវត្តយុទ្ធសាស្ត្រចតុកោណដំណាក់កាលទី៣ របស់រាជរដ្ឋាភិបាល ដែលនាយករដ្ឋមន្ត្រីបានប្រកាសនៅក្នុងអង្គប្រជុំគណៈរដ្ឋមន្ត្រីលើកទី១ សម្រាប់នីតិកាលទី៥។
រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារ៉ុន ថ្លែងថា អាណត្តិថ្មីរបស់រាជរដ្ឋាភិបាល គឺជារបត់ថ្មីមួយ ក្នុងការអភិវឌ្ឍវិស័យអប់រំនៅកម្ពុជា គឺត្រូវដណ្ដើមមកវិញនូវបេះដូងបុគ្គលិកសិក្សា និងយុវជន ដែលស្ថិតក្នុងវ័យសិក្សា។ លោកថ្លែងយ៉ាងដូច្នេះ ក្នុងសន្និសីទស្ដីពីការងារអប់រំ យុវជន និងកីឡា ឆ្នាំ២០១៣ នៅវិទ្យាស្ថានជាតិអប់រំ កាលពីព្រឹកថ្ងៃទី២១ ខែតុលា ដែលមានការចូលរួមពីថ្នាក់ដឹកនាំក្រសួង និងមន្ត្រីក្រោមឱវាទក្រសួងអប់រំ ប្រមាណ ៩០០នាក់។
លោក ហង់ ជួនណារ៉ុន៖ «ហើយធ្វើការមិនចេះតែបក្ខពួកគេ តែងតាំងតែបក្ខពួកខ្លួនឯងទៅអ្នកផ្សេងទៀតអត់មើល អ៊ីចឹងជាចំណុចមួយ អ្នកដែលគ្នាពូកែ គេអត់ចង់នៅទេកន្លែងហ្នឹង ធ្វើម៉េចត្រូវតែចេញទៅធ្វើការនៅខាងក្រៅ ហើយបើសិនជាយកបក្ខពួកនិយម យកគ្រួសារនិយមទៅ ដូចបក្ខពួកខ្លួន បានឡើងតំណែង អាហ្នឹងហើយដែលបង្កើតជាបញ្ហាធំ»។
លោកបន្តថា ក្រៅពីកែលំអគុណភាពអប់រំ ក៏ត្រូវពិនិត្យកន្លែងលេងកីឡារបស់សិស្សដែរ៖ «កំណែទម្រង់វិស័យកីឡាធំណាស់។ យើងមើលការគ្រប់គ្រងរបស់យើងកន្លងទៅនេះ ហាក់មានការធូររលុង ដោយសារតែកន្លែងដែលទាត់បាល់កីឡាដ្ឋានជាតិ គេយកទៅជួលទៅអីធ្វើឲ្យមានបញ្ហា។ អ៊ីចឹង ត្រូវពិនិត្យឡើងវិញ អ្នកដែលកាន់ខាងកីឡា សុំពិនិត្យឡើងវិញ ហើយកែទម្រង់វិស័យរបស់ខ្លួន»។
វេទិកាបានកំណត់អាទិភាពនៃកំណែទម្រង់វិស័យអប់រំ យុវជន និងកីឡា ឆ្នាំ២០១៣ ទៅឆ្នាំ២០១៨។
លោក ហង់ ជួនណារ៉ុន បន្តថា ដើម្បីធ្វើកំណែទម្រង់វិស័យអប់រំ ក្រសួងអប់រំ បានរៀបចំឯកសារឲ្យមានការកែទម្រង់ដូចជា ឧត្តមសិក្សាត្រូវជជែកគ្នារវាងផ្ទៃក្នុងក្រសួង ជាមួយនឹងគ្រឹះស្ថានឧត្តមសិក្សា ហើយអនុវត្តឲ្យបានក្នុងរយៈពេល ៥ឆ្នាំ។ ទី២ គោលនយោបាយបណ្ដុះបណ្ដាលបច្ចេកទេស។ ទី៣ គោលនយោបាយស្ដីពីការបង្កើតការងារដល់យុវជន៖ «ពីព្រោះយុវជនហ្នឹងសំខាន់ណាស់ ៥០% នៃប្រជាជនកម្ពុជា មានអាយុពី ១៥ឆ្នាំ ទៅ ២៤ឆ្នាំ ហើយបើគិតទៅដល់ ៣០ឆ្នាំ មានជាង ៧០%។ អ៊ីចឹង ការងារយុវជននេះ គឺសំខាន់ណាស់ ដែលយុវជនយើងដែលមិនសូវមានជំនាញអ៊ីចឹង យើងត្រូវមានវគ្គបណ្ដុះបណ្ដាលខ្លី វែងអ៊ីចឹង ការផ្តល់អាហារូបករណ៍អ៊ីចឹង»។
លោក ហង់ ជួនណារ៉ុន បន្ថែមថា មានការរិះគន់ពីការប្រឡងបាក់ឌុប ដែលត្រូវកែលំអ និងត្រូវជជែកគ្នាតាំងពីឥឡូវ រហូតដល់ចុងឆ្នាំ។ ការជជែកត្រូវឲ្យអស់ពីវិធានការដែលត្រូវធ្វើ ហើយនៅពេលប្រឡងបាក់ឌុប លើកក្រោយ ត្រូវធ្វើឲ្យបាន ដោយធ្វើយ៉ាងណាឲ្យទាំងអស់គ្នាទទួលស្គាល់៖ «ព្រោះសង្គមយើងគេមើលការងារមិនល្អមកពីបាក់ឌុប វាមិនកើត។ អ៊ីចឹងអ្នកដែលប្រឡងចេញហ្នឹង ក៏មានបញ្ហា ហើយទៅមុខទៀត ក៏មានបញ្ហា ហើយបើយើងធ្វើរឿងនេះមិនបាន យើងចង់ធ្វើអីទៀតដែលល្អក៏គេអត់ជឿដែរ»។
បុគ្គលិកសិក្សាចូលរួមក្នុងវេទិកាស្ដីពីការងារអប់រំ យុវជន និងកីឡា នាវិទ្យាស្ថានជាតិអប់រំ រាជធានីភ្នំពេញ កាលពីថ្ងៃទី២១ ខែតុលា ឆ្នាំ២០១៣។ RFA/Ouk Savborey
លោកបន្ថែមថា កន្លងមកការគ្រប់គ្រងទ្រព្យសម្បត្តិសាធារណៈរបស់រដ្ឋ បានធ្វើការផ្ទុយគ្នា។ អ្នកកាន់គោលនយោបាយ មិនបានធ្វើការជាមួយអ្នកកាន់ថវិកាទេ ឥឡូវនេះត្រូវប្ដូរឲ្យមានការអង្គុយជជែកគ្នា ដើម្បីធ្វើយ៉ាងណាឲ្យមានកិច្ចសហការគ្នា ដើម្បីអភិវឌ្ឍជាតិទាំងមូល៖ «អ្នកដែលកាន់គោលនយោបាយមានតែគោលនយោបាយ អ្នកដែលកាន់លុយមានតែលុយ។ ដល់អ៊ីចឹង វាអត់ស៊ីគ្នា អ៊ីចឹងយើងត្រូវធ្វើម៉េចឲ្យវាស៊ីគ្នា ពីរឿងគោលនយោបាយ ហើយនិងធនធាន ទាំងធនធានមនុស្ស ក៏ដូចជាធនធានហិរញ្ញវត្ថុ»។
ប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន ថ្លែងថា សមាគមនេះរង់ចាំមើលការអនុវត្តយុទ្ធសាស្ត្រកំណែទម្រង់វិស័យអប់រំរបស់ក្រសួងអប់រំ ដែលស៊ីជម្រៅ ហើយសមាគមគ្រូនឹងគាំទ្រការអនុវត្តបាន ប្រសិនបើរដ្ឋមន្ត្រីឡើងកាន់តំណែងថ្មីជួយស៊ើបអង្កេតពីអំពើពុករលួយនៅពេលប្រឡងគ្រូថ្មីៗ នៅតាមបណ្ដាខេត្តដែលកំពុងតែមានសំណូក៖ «ប្រឡងគ្រូឧត្តមសិក្សាថ្ងៃ២៩ កញ្ញា កន្លងទៅនេះ ក៏ឃើញមានការពុករលួយពី ៣ពាន់ដុល្លារ ទៅ ៣.៥០០ដុល្លារ ជាប់ ហើយឲ្យលោករដ្ឋមន្ត្រីត្រូវតែធ្វើការស៊ើបអង្កេត»។
សេចក្តីប្រកាសព័ត៌មានរបស់ក្រសួងអប់រំពីការកែទម្រង់មាន ទី១ បញ្ហាប្រឈមចំពោះមុខ ដូចជាការគ្រប់គ្រងបុគ្គលិក ការប្រឡងនៅគ្រប់កម្រិតសិក្សា គុណភាពអប់រំយុវជនមានជំនាញទាប។ ទី២ បញ្ហាគន្លឹះ ដូចជា ពង្រឹងការគ្រប់គ្រងហិរញ្ញវត្ថុ និងការគ្រប់គ្រងទ្រព្យសម្បត្តិរដ្ឋ ពង្រឹងការគ្រប់គ្រងបុគ្គលិក ពង្រឹងការប្រឡងគ្រប់ប្រភេទ បង្កើតធនាគារខួរក្បាលក្នុងវិស័យអប់រំ កំណែទម្រង់ឧត្តមសិក្សា បង្កើនគុណភាពសិក្សាឲ្យមានការអភិវឌ្ឍសម្រាប់យុវជន នូវជំនាញបច្ចេកទេស និងជំនាញទាន់ពេល និងកំណែទម្រង់ការអប់រំកាយ និងកីឡា៕
ផ្សាយបន្តពី៖ ទំព័រព័ត៌មានខ្មែរ
No comments:
Post a Comment