ព្រះរាជពិធីរើសព្រះបរមអដ្ឋិព្រះបរមរតនកោដ្ឋ
ដោយ ទេព សុរ៉ាវី
2013-02-05
ព្រះរាជពិធីរើសព្រះបរមអដ្ឋិរបស់ព្រះបរមរតនកោដ្ឋ ត្រូវបានរៀបចំឡើងតាំងពីម៉ោងជាង ៧ព្រឹក ថ្ងៃទី៥ ខែកុម្ភៈ។ ព្រះរាជពិធីនេះត្រូវបានមន្ត្រីគណៈកម្មាធិការជាតិរៀបចំព្រះរាជពិធីបុណ្យបញ្ជាក់ថា ជាព្រះរាជពិធីដែលប្រតិបត្តិតាមព្រះរាជប្បវេណី ដែលមានតាំងពីព្រះអង្គក្សត្រមុន។
ព្រះរាជពិធីដង្ហែព្រះអង្គារទៅបំប្លែងនៅទន្លេចតុមុខ នៅព្រឹកថ្ងៃទី៥ កុម្ភៈ ឆ្នាំ២០១៣។
ព្រះករុណាព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ និងសម្ដេចព្រះមហាក្សត្រី ព្រះវររាជមាតាជាតិខ្មែរ យាងរើសព្រះបរមអដ្ឋិដោយផ្ទាល់ព្រះហស្ត ដាក់លើតោកមាស ដោយមានក្រុមបារគូ ថ្វាយទក្ខិណាពពិល ៩ជុំ និងភ្លេងពិណពាទ្យប្រគំ។
ក្នុងពិធីរើសព្រះបរមអដ្ឋិ គេឃើញមានការនិមន្តព្រះសង្ឃចំនួន ១២អង្គ សម្រាប់ថ្វាយពរទឹក និងថ្វាយប្រែព្រះបរមរូប។
ព្រះមហាក្សត្រ និងសម្ដេចព្រះមហាក្សត្រី ព្រះវររាជមាតាជាតិខ្មែរ បានយកទឹកដូង និងទឹកបរិសុទ្ធមកពីភ្នំគូលែន នៅខេត្តសៀមរាប សម្រាប់សម្អាតព្រះបរមអដ្ឋិ។
ព្រះមហាក្សត្របានហែព្រះបរមអដ្ឋិពីព្រះបរមមេរុទៅតម្កល់ក្នុងព្រះពន្លាខាងត្បូង ដោយអមនឹងក្រុមបារគូថ្វាយស័ង្ខ។ ទ្រង់បានតម្កល់ព្រះបរមអដ្ឋិចំនួន ២តោកមាស ទៅលើមហាបញ្ចា ៩ជាន់ ដែលមហាបញ្ចា ៩ជាន់នោះឋិតនៅព្រះពន្លាខាងត្បូង។ ក្រោយពីតម្កល់ព្រះបរមអដ្ឋិហើយនោះ ព្រះសង្ឃចំនួន ៩០អង្គ បានថ្វាយព្រះធម៌បង្សុកូលក្នុងពិធីនោះ។
នៅវេលាម៉ោង ៥រសៀលថ្ងៃដដែល មានការយាងព្រះបរមអដ្ឋិឲ្យគង់ក្នុងព្រះកោដ្ឋពេជ្រ ហើយនិងបានយាងព្រះបរមអដ្ឋិគង់ក្នុងព្រះកោដ្ឋពេជ្រនោះ យកទៅតម្កល់ក្នុងព្រះមេរុ។
នៅវេលាម៉ោង ៥រសៀលថ្ងៃដដែល មានការយាងព្រះបរមអដ្ឋិឲ្យគង់ក្នុងព្រះកោដ្ឋពេជ្រ ហើយនិងបានយាងព្រះបរមអដ្ឋិគង់ក្នុងព្រះកោដ្ឋពេជ្រនោះ យកទៅតម្កល់ក្នុងព្រះមេរុ។
ចំពោះព្រះអង្គារ (ធ្យូងដែលសល់ពីការថ្វាយព្រះភ្លើង) ព្រះមហាក្សត្រក៏បានកើបដោយផ្ទាល់ព្រះហស្ត សម្រាប់ពិធីដង្ហែទៅតម្កល់លើតោកមាស និងតម្កល់លើព្រះទីន័ងរាជរថ ហែដោយក្បួនទៅបំប្លែងក្នុងទន្លេចតុមុខ។
អនុប្រធានគណៈកម្មាធិការជាតិរៀបចំព្រះរាជពិធីបុណ្យ លោក ញឹក ប៊ុនឆៃ បញ្ជាក់ថា ពិធីបំប្លែងព្រះអង្គារនៅតាមទន្លេ គេឃើញមានតាំងពីបុរាណ គឺតាំងពីអង្គក្សត្រមុនៗ ដោយគេមានជំនឿថា ការបាចផេះផង់ទាំងនោះចូលក្នុងទន្លេ នឹងធ្វើឲ្យមានការត្រជាក់ត្រជំ ប្រទេសជួបតែសេចក្ដីសុខសន្តិភាព។ ម្យ៉ាងការបាចព្រះអង្គារ ឬផេះផង់នោះ គេក៏ឃើញមានធ្វើឡើងចំពោះអង្គក្សត្រមួយចំនួននៅប្រទេសថៃ ដែលគោរពប្រតិបត្តិសាសនាព្រះពុទ្ធដូចប្រទេសកម្ពុជាដែរ៖ «ពីអង្គមុនៗ ក៏គេធ្វើអ៊ីចឹងដែរ ចង់បម្លែងថា ឲ្យប្រទេសបានសុខសន្តិភាព ឲ្យសុខសប្បាយ»។
ទោះជាយ៉ាងណា ព្រះមហាក្សត្រ និងសម្ដេចព្រះមហាក្សត្រីព្រះវររាជមាតាជាតិខ្មែរ មិនបានស្ដេចយាងទៅដង្ហែព្រះអង្គារយកទៅបំប្លែងក្នុងទន្លេទេ ដោយស្ដេចយាងប្រទានឲ្យសម្ដេច នរោត្តម យុវនាថ ដែលជាបុត្រារបស់អតីតព្រះមហាក្សត្រ រោត្តម សីហនុ ជាព្រះរាជតំណាងអមដោយព្រះរាជវង្សានុវង្ស។
ព្រះអង្គារត្រូវបានតម្កល់លើព្រះទីន័ងដង្ហែតាមក្បួនតុបតែងជារាងរូបនាគរាជ ដោយមានសម្ដេចព្រះសង្ឃរាជទាំងពីរគណៈ ព្រះរាជវង្សានុវង្ស និងក្រុមបារគូជិត ១០០នាក់ យកទៅបំប្លែងក្នុងទន្លេចតុមុខ ខាងមុខព្រះបរមរាជវាំង។
មន្ត្រីគណៈកម្មាធិការជាតិរៀបចំព្រះរាជពិធីបុណ្យបញ្ជាក់ថា នៅថ្ងៃទី៦ នៃពិធីបុណ្យជាពិធីសាសនា ហើយនៅពេលយប់នឹងមានការអុជប្រទីបជ្វាលានៅព្រះបរមមេរុ និងបរិវេណជុំវិញ និងមានការអុជកាំជ្រួចភ្ញីទៀន។ ពិធីបុណ្យថ្ងៃចុងក្រោយ គឺថ្ងៃទី៧ គឺជាព្រះរាជពិធីដង្ហែព្រះបរមអដ្ឋិក្នុងកោដ្ឋពេជ្រ គង់លើព្រះរាជទីន័ងបុស្បុកពីព្រះបរមមេរុ កាត់តាមផ្លូវសំខាន់ៗមួយចំនួនក្នុងរាជធានីភ្នំពេញ ចូលមកតម្កល់ក្នុងព្រះបរមរាជវាំង៕
ចម្លងការផ្សាយពី វិទ្យុអស៊ីសេរីភាសាខ្មែរ
No comments:
Post a Comment